MIGRANT OILALARDA TARBIYALANAYOTGAN O‘SMIRLARDA PROSOTSIAL XULQ-ATVOR VA EMPATIYA MUNOSABATI

##article.abstract##

Mazkur maqolada migrant oilalarda tarbiyalanayotgan o‘smirlarda prosotsial xulq-atvor va empatiya o‘rtasidagi o‘zaro bog‘liqlikning ijtimoiy-psixologik jihatlari tahlil qilingan. Globallashuv va migratsiya jarayonlarining jadallashuvi natijasida ko‘plab oilalarda ota-onalarning uzoq muddatli mehnat migratsiyasida bo‘lishi o‘smirlarning shaxsiy rivojlanishi, emotsional holati va ijtimoiy munosabatlariga sezilarli ta’sir ko‘rsatmoqda. Tadqiqotda empatiya prosotsial xulq-atvorning muhim psixologik omili sifatida ko‘rib chiqilib, uning boshqalarning hissiy holatini tushunish, hamdardlik bildirish va ijtimoiy qo‘llab-quvvatlashga yo‘naltirilgan xatti-harakatlarni shakllantirishdagi o‘rni yoritilgan. Shuningdek, migrant oilalarda voyaga yetayotgan o‘smirlarning oilaviy munosabatlari, emotsional yaqinlik darajasi, kommunikativ tajribasi hamda ijtimoiylashuv jarayonlari prosotsial xulq-atvor rivojlanishiga qanday ta’sir etishi ilmiy manbalar asosida tahlil qilingan. Tadqiqot natijalari empatiya darajasi yuqori bo‘lgan o‘smirlarda yordam ko‘rsatish, hamkorlik qilish, mehr-shafqat namoyon etish va ijtimoiy mas’uliyat hissining kuchliroq shakllanishini ko‘rsatadi. Aksincha, ota-onadan uzoqlashish, emotsional qo‘llab-quvvatlashning yetishmasligi va oilaviy munosabatlarning sustligi empatiya hamda prosotsial xulq-atvor ko‘rsatkichlarining pasayishiga sabab bo‘lishi mumkinligi aniqlangan. Maqolada migrant oilalardagi o‘smirlarda empatiya va prosotsial xulq-atvorni rivojlantirishning psixologik-pedagogik imkoniyatlari, oilaviy tarbiya, ta’lim muassasalari va psixologik xizmatlar faoliyatini takomillashtirish bo‘yicha ilmiy-amaliy tavsiyalar ishlab chiqilgan. Olingan natijalar migrant oilalarda tarbiyalanayotgan o‘smirlarning ijtimoiy moslashuvi va shaxslararo munosabatlarini optimallashtirishga xizmat qiladi.