JANUBIY KOREYALIK YOZUVCHI KON JIYONNING “BIZNING BAXTLI DAMLARIMIZ” ROMANIDAGI OBRAZLAR RUHIYATI TASVIRI

##article.abstract##

Mazkur ilmiy maqola janubiy koreyalik yozuvchi Kon Jiyonning “Bizning baxtli damlarimiz” romanida o‘smirlik davri tasvirining badiiy va psixologik tahliliga bag‘ishlangan. Asarda bosh qahramonlar — Mun Yujon va Chon Yunsu — hayoti misolida o‘smirlik davrida kechgan og‘ir travmatik tajribalarning shaxsiy identiklik, emotsional rivojlanish va ruhiy holatga ko‘rsatgan uzoq muddatli ta’siri chuqur yoritiladi. Maqolada o‘smirlik bosqichi oddiy biografik epizod sifatida emas, balki qahramonlar psixologik shakllanishida hal qiluvchi bosqich sifatida tahlil qilinadi. Maqola doirasida travma psixologiyasi, rivojlanish psixologiyasi, adabiyotshunoslik va madaniyatshunoslik sohalarini birlashtiruvchi interdiscipliner yondashuv qo‘llaniladi. Yozuvchi Kon Jiyon o‘z romanida ruhiy travma, emotsional izolyatsiya, gender rollari, jamiyat bosimi, diniy qadriyatlar va ijtimoiy tengsizlik singari dolzarb mavzularni o‘smirlik tajribasi kontekstida yoritadi. Muallif retrospektiv narratsiya, ichki monolog, ong oqimi kabi psixologik realizmga xos adabiy vositalar orqali o‘quvchini qahramonlarning ichki kechinmalari bilan yaqinlashtiradi. Maqola, shuningdek, o‘smirlik obrazining ijtimoiy va axloqiy yukini ochib berar ekan, bu davrni adabiy va psixologik tahlil qilish orqali jamiyatdagi ruhiy salomatlik, gender tengligi va shaxsiy rivojlanishga oid muhim muammolarga e’tibor qaratadi. Ushbu tadqiqot Gon Jiyon romanining o‘ziga xos estetik va sotsial ahamiyatini yoritib beradi hamda zamonaviy koreys adabiyoti doirasida o‘smirlik fenomenining badiiy talqiniga ilmiy hissa qo‘shadi.